Mga Uri ng Kanser sa Suso

Ang nasusuring kanser sa suso ay bukod-tangi sa bawat tao. Habang mayroong mga pangkaraniwang mga uri ng kanser sa suso, mahalaga na makipag-usap ka sa iyong manggagamot upang matiyak ang iyong natatangi na kalagayan.

Paliwanag Tungkol sa Kanser sa Suso “in situ”

Upang masuri ang kanser sa suso “in situ”, sinusuri ng isang pathologist ang biopsy specimen sa ilalim ng mikroskopyo. Ang nasuring kanser sa suso “in situ” ay nangangahulugang nakita sa biopsy na ang kanser sa suso ay hindi lubhang mapaminsala. Ang kanser sa suso na “in situ” ay maaaring ductal carcinoma in situ (DCIS) na nagmula sa ductal epithelium o di kaya’y lobular cancer in situ (LCIS) na nagmula naman sa epithelium of the lobules.

Sa paglaganap ng gumagamit ng mammography, ang hindi lubhang mapaminsalang mga kanser (DCIS at LCIS) ay madalas nang nasusuri at bumubuo na ngayon ng 15 hanggang 20 porsiyento ng lahat ng kanser sa suso.

Ibang mga Uri ng Kanser sa Suso

• Infiltrating ductal carcinoma: kanser na kumalat na sa labas ng tubo ng gatas
• Infiltrating lobular carcinoma: Kanser na kumalat na sa labas ng lobe ng suso. 86 porsiyento ng kanser sa suso ay nagmumula sa tubo ng gatas habang 12 porsiyento naman ang nagmumula sa mga lobes ng suso.
• Paget’s disease: nakikilala sa pamamagitan ng pangangati at pangangaliskis
• Inflammatory: madalas napapag-kamalan na impeksiyon
• Tubular: mga kanser na mukhang maliliit na mga tubo
• Medullary: kanser na kakulay ng himaymay ng utak
• Mucinous: infiltrating ductal kanser na gumagawa ng uhog
• Papillary: kanser na nakatayo o mukhang mga daliri

Ductal carcinoma in situ

Ang ductal carcinoma in situ (DCIS) ang pinaka-maagang nasusuri na kanser sa suso at madalas nasusuri sa pamamagitan ng mammography kung saan nakikita ang maliliit na mga bukol sa suso. Kadalasan, hindi man lamang naghihinala ang mga pasyente na mayroon silang kanser sa suso. Kapag hindi nagamot ang DCIS, halos 30 porsiyento ng mga pasyente ang magkakaroon ng malalang kanser sa suso sa loob ng mga 10 taon mula sa unang pagsusuri. Iba’t ibang kadahilanan ang maaaring humikayat sa pasyente sa kahuli-hulihan upang ipagamot ang kanser. Maaaring ang dahilan ng pagpapagamot ay upang mapabuti ang mga sintomas sa pamamagitan ng local na pagpigil ng kanser o di kaya’y upang patagalin ang kaligtasan ng pasyente. Kailangan timbangin ang maaaring maging kabutihan ng pagpapagamot ng kanser sa maaaring maging panganib ng pagpapagamot. Karamihan sa mga bagong paggagamot ay galing sa mga pagsusubok sa klinika.

Ang DCIS ay maaaring ituring na isang panimulang pagtubo pa lamang ng mga di-pangkaraniwang cells sa mga tubo ng suso. Sa kasaysayan ng paggagamot, ang DCIS ay bihirang nasusuri sa mga kababaihan at di-gaanong binigyan pansin ang paggamot nito, dahil ang DCIS ay 100 porsiyentong nagagamot sa pamamagitan ng surgical mastectomy. Sa ngayon, maaari na rin itong magamot sa pamamagitan ng lumpectomy at radiation. Sa pagdami ng gumagamit ng mammography, malamang na masuri sa mga kababaihan ang kanser habang nagsisimula pa lamang, kaya nga dumarami ang mga kababaihan na nasusuring mayroong DCIS.

Infiltrating ductal carcinoma

Ang infiltrating ductal carcinoma ay ang pangkaraniwang kanser sa suso, halos 70 porsiyento ng mga kaso. Isa itong napakatigas na bukol at baku-bako ang gilid at pakiwari mo ay nakakapit sa mga himaymay ng suso. Ang balat sa labas nito o di kaya’y ang utong ay maaaring umurong.

Sa pamamagitan ng mammography, maaaring makakita ng maliliit pang mga bukol sa bahagi ng bukol dahil ang bukol na ito ay mayroong kasaysayan ng internal cell death (necrosis) o pagkamatay ng internal cells. Nagkakaiba ang laki ng bukol at ang panahon ng pagkakahiwa-hiwalay ng mga cells. Mayroong mga cells na mabilis tumubo kaysa iba.

Infiltrating lobular carcinoma

5 porsiyento ng lahat ng nakamamatay na kanser ay ang infiltrating lobular carcinoma. Ito ay kadalasang nangyayari sa mga kababaihan na nagkaka-edad ng 45 at 56. Ang bukol ay tumutubo sa hulihang bahagi ng lobules kung saan nagagawa ang gatas. Kadalasan, hindi ito nakikita sa mammography at nararamdaman ito bilang pamamaga sa itaas at labas ng ika-apat na bahagi ng suso (simula sa utong hanggang sa ilalim ng braso).

Ang kanser na ito ay madalas matatagpuan sa iba’t ibang bahagi ng suso (multicentric) ngunit sa 30 porsiyento ng mga kaso, ang kanser na ito ay matatagpuan sa kabilang suso. Kahuli-hulihang palatandaan ng isang malaking bukol ay maaaring ang pagkunot ng balat sa bahagi nito. Karamihan sa mga bukol ay mayroong estrogen at progesterone receptors at mapapagaling ng hormonal therapy. Minsan malaki ang pagkakataon na ang infiltrating lobular carcinoma ay kumalat sa bahay-bata (uterus) at sa bahay-itlog (ovaries).

Lobular Carcinoma In Situ

Pinagtatalunan ang paggagamot ng lobular carcinoma in situ (LCIS). Napag-iisip na ang LCIS ay palatandaan ng paglaki ng panganib na magkaroon ng kanser sa suso, ngunit hindi ibig sabihin na ito ay siyang dahilan ng pagkakaroon ng kanser sa suso. Ang di-pangkaraniwang pangyayari na ito ay kadalasan kumakalat sa suso at madalas sabay nangyayari sa dalawang suso.

Iba’t ibang kadahilanan ang maaaring humikayat sa pasyente upang magpagamot sa kanser. Maaaring ang dahilan ng pagpapagamot ay upang mapabuti ang mga sintomas sa pamamagitan ng lokal na pagpigil ng kanser o di kaya’y upang patagalin ang kaligtasan ng pasyente. Kailangan timbangin ang maaaring maging kabutihan ng pagpapagamot ng kanser sa maaaring maging panganib ng pagpapagamot.

Ang mga sumusunod ay mga paliwanag tungkol sa paggamot ng LCIS. Nababatay sa iyong bukod-tanging kalagayan at sa pagkakasuri ng iyong kanser ang magiging bisa ng mga paggagamot na ito. Ang layunin ng mga kaalaman na matatagpuan sa Website na ito ay ang maturuan ka tungkol sa iba’t ibang uri ng paggagamot upang magkaroon ka at ang iyong manggagamot ng pagkakaisa tungkol sa nararapat na paggamot ng iyong kanser.

Hango sa pang-matagalan na pag-aaral ng nakaraan, tinatantiya na humigit-kumulang na 25 porsiyento ng mga pasyente na mayroong LCIS ay magkakaroon ng kanser sa suso sa loob ng 25 taon simula sa unang pagsusuri. Kaya ang pagsusuri na ito ay ginagamit upang alamin kung sino sa mga pasyente ang mayroong malaking panganib na magkaroon ng kanser sa suso. Mga kasalukuyang paggagamot ng LCIS ay ang pag-opera upang tanggalin ang LCIS o ang paggamot gamit ang anti-estrogens upang mabawasan ang panganib na magkaroon ng kanser sa suso.

Pagmamanman Lamang matapos ang Biopsy

Ang pagmamanman ay isang pangkaraniwang uri ng pangangalaga sa mga pasyenteng mayroong LCIS. Marami sa mga pasyente ang hindi na tumanggap pa ng paggagamot matapos ang unang pag-opera kung saan tinanggal ang LCIS upang masuri. Sa isang pag-aaral, sinuri ng mga mananaliksik ng National Surgical Adjuvant Breast and Bowel Project (NSABP) ang 182 na pasyente na mayroong LCIS. Pagkaraan ng 5 taon natagpuan na ang panganib na magkaroon ng kanser sa suso matapos ang pag-opera ay nasa 3.3 porsiyento lamang, 2.2 porsiyento ang nagkaroon ng kanser sa susong na-opera at 1.1 porsiyento ang nagkaroon ng kanser sa kabilang suso. Ang mga pasyenteng pumili ng pagmamanman lamang ay nangangailangan magpasuri taun-taon at mag biopsy kapag kinailangan. At kahit pa kung ang mammogram ay di-gaanong nakakatunton ng LCIS, nararapat ding sumailalim sa mammogram taun-taon. Ang mga kababaihan na mayroong LCIS ay maaring magpasuri taun-taon sa pamamagitan ng CT or MRI kasama ng mammography.

Namamagang Kanser sa Suso

Ang namamagang kanser sa suso (Inflammatory Breast Kanser or IBC) ay may kinalaman sa balat ng suso. 4 porsiyento ng mga kanser sa susong nasusuri sa bawa’t taon sa U.S. ay IBC. Ang palatandaan nito ay ang pamumula ng balat ng suso at ang pamamaga ng suso. Sa ibang mga kaso, mayroong bukol na matatagpuan dito.

Mga Babalang Palatandaan ng IBC

• Ang pagbabago ng kayarian ng suso – namumulang balat o mukhang kulubot o tulad ng dalandan
• Paglaki ng suso sa loob ng maikling panahon
• Pagbabago ng utong – naging pantay o bumaliktad at maaaring nilalabasan
• Ang bahagi ng suso ay nangangati sa loob ng mahabang panahon at hindi nabibigyan ginhawa ng anumang pamahid o krema.
• Biglang pagkakaroon ng malaking bukol sa suso
• Pananakit ng suso
• Pamamaga ng lymph nodes sa ilalim ng braso o di kaya’y sa itaas ng balikat

Lahat ng mga palatandaan na ito ay maaaring makita sa mga pangkaraniwan at di- mapanganib na mga karamdaman ng suso, ngunit kapag ikaw ay nagkaroon ng kahit alin sa mga palatandaan na ito, makipagkita sa iyong manggagamot.

Ang unang magiging tugon ng manggagamot ay maaaring ang pag-aakala na mayroong lamang impeksiyon at magbigay ng antibiotics. Maaaring ito ang nararapat na gamot sa impeksiyon ngunit ipinapayo namin na ang pasyente ay humiling ng biopsy sa balat upang masiguro kung ito ba ay IBC o hindi.

HUWAG MAGGAMOT NG ANTIBIOTICS NG PANGALAWA O PANGATLONG BESES NANG HINDI SUMASAILALIM SA BIOPSY SA BALAT.

Ang biopsy sa balat ay ang pagtanggal ng maliit na bahagi ng balat ng suso. Ang balat na ito ay ipinapadala sa isang pathologist upang masuri kung ito ay mayroong kanser cells at ang kinalabasan ay itatalakay sa iyo ng iyong manggagamot.

Sa mga pag-aaral ng inflammatory breast cancer, nakita na ang uri ng kanser na ito ay mas masigasig kaysa ibang mga uri ng kanser sa suso. At dahil ang inflammatory breast cancer (IBC) ay nasa balat ng suso nang sinuri ito, kinakailangan na simulan ang paggagamot ng chemotherapy bago ang pag-opera upang alisin ang bukol o ang suso. Ibinibigay muna ang chemotherapy bago ang pag-opera upang puksain ang kanser cells na nasa balat at suso at nang mabawasan ang pagkalat ng kanser sa dibdib matapos ang pag-opera.

Paggagamot

Mga Pagsubok na Panggagamot

Maraming mga pagsubok na panggagamot na maaaring malaman ng mga kababaihan na nasuring mayroong IBC at hinihimok din ang mga kababaihan na sumali sa mga pagsubok upang makatanggap ng mga pinakabagong panggagamot.
Hindi lamang sa pamamagitan ng mga pagsubok na panggagamot maaaring magkaroon ng mga panibagong paggagamot – ang mga paggagamot na napahintulutan ng FDA ay maaari ding magamit ng mga oncologist. Ngunit sa mga pagsubok na panggagamot, maaaring magkaroon ka ng mga droga na hindi pa kalat at pinag-aaralan pa lamang kung ito ay mabisa laban sa IBC.

Mahalaga rin sa mga kababaihan na mayroong IBC na sumangguni ng iba’t ibang hatol tungkol sa paggamot at pag-aralan din ang pagpapagamot sa isang akademya ng medisina. Ang mga manggagamot sa isang akademya ng medisina ay maaaring mas malawak na ang karanasan sa paggamot ng IBC o mayroong mga kaalaman tungkol sa pinakabagong paggamot na napatunayang mabisa. Dahil ito ay pambihirang kanser, marami sa mga manggagamot ang hindi pa nakakatagpo ng ganitong uri sa kanilang propesyon. Makatwiran lamang ang humingi ng payo mula sa mga akademya ng medisina, gumawa ng pasiya tungkol sa uri ng pagpapagamot at hayaan ang oncologist na makipag-ugnay sa iyong manggagamot.

Chemotherapy at Mastectomy
Pagkatapos ng paggamot sa pamamagitan ng chemotherapy (kadalasan anim hanggang walong buwan), ito ay sinusundan ng pagsasagawa ng mastectomy kasama na ang axillary node dissection. Mahalaga ang mastectomy upang mabawasan ang panganib na magbalik ang karamdaman at nang maituloy ang lokal na pamamahala. Isa itong pinagandang salita ng mga siruhano na ang ibig sabihin ay mas maigi nang alisin ang suso upang lalong masiguro na tanggal na ang kanser. Matapos ang mastectomy, ang isang babaeng mayroong IBC ay kadalasan tatanggap ng karagdagang chemotherapy at radiation sa dibdib.

Samantalang ang inflammatory breast cancer ay isa sa pinaka-mahirap gamutin na kanser, maraming nakaligtas na maaari mong makausap. Tumawag sa 24-oras Y-ME National Breast Cancer Hotlines sa 1-800-221-2141 (Ingles) at 1-800-986-9505 (Kastila) at humiling na maitambal ka sa isang nakaligtas sa IBC. Alam namin na nakakatakot ang mga sandaling ito at narito kami upang makatulong sa pagbigay ng kaalaman at alalay. Marami ring mga kababaihan ang nanggaling na riyan.

Mga Katha-katha at Mga Katotohanan Tungkol sa IBC

Katha-katha: Kapag wala akong bukol, wala akong kanser sa suso.

Katotohanan: Bihirang may makitang bukol kapag mayroong IBC. Ang IBC ay tumutubo sa dingding ng dibdib at kadalasan ay nasusuri lamang matapos nitong mahawahan ang suso at pati na rin ang ibang bahagi ng katawan.

Katha-katha: Ang suso ko ay nagmumukhang balat ng dalandan. Katatapos ko pa lamang magpa-mammogram at wala namang nakitang suliranin. Hindi ito mahalaga.

Katotohanan: Kadalasan, ang IBC ay hindi nasusuri ng mga mammogram, ultrasound at kahit ng mga biopsy hanggang hindi nito naaapekto ang mga himaymay at mga bahagi ng katawan. Kapag nagkaroon ng pagbabago ang anyo o kayarian ng iyong suso, kapag ito ay mainit o di kaya’y nagbago ang iyong utong, ang agad na pakikipagkita sa iyong manggagamot ay maaaring makaligtas ng iyong buhay.

Katha-katha: Namamaga at mainit ang suso ko. Ang sabi ng aking manggagamot ay impeksiyon lamang ito at kailangan sumubok ng ibang uri ng antibiotics.

Katotohanan: Habang sumusubok ka ng iba’t ibang antibiotics, mahalagang panahon ang nasasayang. Ipilit ang pagpa-mammogram, ultrasound o di kaya’y biopsy. Maaaring ang mga unang pagsusuri ay walang makita ngunit kapag ang antibiotic ay wala pa ring bisa sa loob ng dalawang linggo, ipilit muli ang pagpa-mammogram, ultrasound o biopsy.

Katha-katha: Lalaki ako at wala akong dapat alalahanin tungkol sa kanser sa suso.

Katotohanan: Ang mga kalalakihan ay maaaring masuri ng pagkakaroon ng kanser sa suso. Lalaki man o babae ay dapat magkaroon ng kaalaman tungkol sa kanilang suso at humingi ng payo sa manggagamot kapag may nakitang pagbabago.

Katha-katha: Ako ay buntis at ang aking mga suso ay namaga at uminit nitong mga nakaraang araw. Bago nuon, ilang linggo itong makati. Malamang ay dahil lamang sa ako ay buntis.

Katotohanan: Ang kanser sa suso ay maaaring dumapo sa anumang oras. Ang IBC ay mabilis at matinding dumapo. Anumang pagbabago sa iyong mga suso ay dapat masuri kaagad. Ang pagpapalipas hanggang sa matapos ang pagbubuntis ay siyang magbibigay hatol kung mapipigil mo ang kanser o ang pagkatalo mo sa karamdamang ito.

Email This Page: